Номинациите за Оскари 2020 беа соопштени денеска, а меѓу кандидатите за најпрестижната филмска награда е и македонскиот документарец „Медена земја“.
Филмот на режисерите Тамара Котевска и Љубомир Стефанов доби две номинации: за Најдобар документарец и за Најдобар странски филм, што значи дека ова е најголемиот успех на македонски филм во светски рамки досега.
Покрај тоа што двете номинации за „Медена земја“ е историски за македонската кинематографија, исто така е историски и за Американската академија за филмска уметност и наука.
За првпат досега во историјата на Оскарите, еден филм е номиниран во иста година и во категоријата Најдобар документарец и во категоријата Најдобар странски фиилм (која до лани се викаше Најдобар филм од неанглиско говорно подрачје).
Филмот за пчеларката Атиџе Муратова се закити со бројни награди на светски фестивали и избори, а двете номинации за Оскар само ја заокружија исклучително успешната година за овој македонски документарец.
„Медена земја“ е номиниран за Најдобар документарен филм заедно со: American Factory, The Cave, The Edge of Democracy и For Sama; и за Најдобар странски филм со: Corpus Christi (Полска), Les Miserables (Франција), Pain & Glory (Шпанија) и фаворитот Parasite (Јужна Кореја).
„Медена земја е всушност историски момент за Оскарите кој докажува дека колку повеќе Академијата ги спојува документарниот и фиктивниот наратив во сите категории на Оскарите, дотолку повеќе ќе прави добро за раскажувачите од целиот свет“, сподели ПР тимот на Медена земја на Fecebook, цитирајќи извадок од текстот на Зак Шарф за Indie Wire.
Оскарите се доделуваат во 25 категории, а 92. издание на оваа престижна свеченост ќе се одржи на 10 февруари, 2020 година.
„Медена земја“ (Honeyland) е прв македонски филм што успеа да добие две номинации за Оскар. Во 1995 година за првпат македонски филм доби номинација за Оскар - „Пред дождот“ на Милчо Манчевски. Третиот филм на Манчевски - „Сенки“ - ѝ беше понуден на Академијата по повод 80-тото доделување на Оскарите, но не влезе меѓу петте номинирани.
Документарниот филм „Медена земја“ е во режија на Љубомир Стефанов и Тамара Котевска. Филмот е во продукција на Атанас Георгиев, кој е и монтажер, а кинематографијата е на Фејми Даут и Самир Љума.
