„Црвените ѓаволи“ имаат ужасен старт сезонава, но управата нема намера да го промени стратегот освен ако ситуацијата не стане катастрофална.
Од Манчестер Јунајтед потврдија дека воопшто не ни размислуваат да му врачат отказ на тренерот Оле Гунар Солскјер. Според потпретседателот Ед Вудвард, за такво нешто би размислиле само доколку резултатите на тимот станат катастрофални.
Не се знае што во Јунајтед подразбираат под „катастрофа“ со оглед на тоа што тимот сезонава од 14 кола собра само 18 бодови и има дури 22 бода заостанување зад лидерот Ливерпул. Исто така, 8 бодови му бега местото кое води во Лигата на шампиони. „Црвените ѓаволи“ остварија 4 победи, 6 нерешени и 4 порази со гол-разлика од 21:17.
Веројатно, под „катастрофа“ управата на клубот подразбира пад во долниот дел на табелата и борба за опстанок. За клуб со реноме како Манчестер, моменталниот пласман секој навивач би го нарекол „катастрофа“. Поблиску се до зоната за испаѓање отколку до зоната која води во Лигата на шампиони бидејќи на 18-тиот Саутемптон му бегаат 6 бодови.
До таква катастрофа би можело да дојде уште во наредните две кола бидејќи Манчестер во среда го пречекува забрефтаниот Тотенхем на Жозе Мурињо, а потоа в недела има гостување кај локалниот ривал Манчестер Сити. Мурињо е желен за одмазда со оглед на тоа што пред една година доби отказ од Јунајтед и беше заменет токму со Солскјер, а за мотивите во гратското дерби не треба да се трошат зборови.
Сепак, според Ед Вудвард, дури и два пораза од овие натпревари не би резултирале со отказ за Солскјер. Тие веруваат дека Норвежанецот поседува квалитет на кој Манчестер може долгорочно да смета. Резултатите не доаѓаат преку ноќ, особено со играчи со какви што располага Солскјер. Вудвард откри дека Солскјер ја има довербата и управата ќе биде трпелива со него дури и доколку Манчестер сезоната ја заврши на средината на табелата.
За да му ја олеснат задачата на Солскјер, управата планира во јануари да го засили тимот со 24-годишниот централен дефанзивец Диклан Рајс од Вест Хем и со тинејџерот Џејдон Санчо кој игра како крило во Борусија од Дортмунд.
