Извршниот директор на Facebook, Марк Закерберг, рече дека и покрај бројните реакции за работата на неговата компанија тој нема намера да поднесе оставка од позицијата. Закерберг годинава дури и се појави пред американскиот Конгрес за да сведочи за прекршувањето на правилата за приватност на неговата компанија, скандал кој беше дел од соработката на Facebook и Cambridge Analytica.
„Не е предвидена оставка“, изјави синоќа Марк Закерберг за телевизијата CNN Business кога беше запрашан дали има намера да отстапи од позицијата претседател на извршниот одбор на Facebook.
Тој исто така застана зад „број два“ човекот во Facebook, Шерил Сандберг, која посебно беше критикувана поради нејзиниот пристап кон кризата која неодамна го погоди Facebook. Марк изјави дека таа е многу важен дел од компанијата и дека секогаш се труди да се избори со бројните предизвици кои стојат пред неа.
„Таа е мој важен партнер веќе 10 години. Навистина сум горд на работата која успеавме да ја завршиме заедно и се надевам дека ќе работиме заедно во децениите кои доаѓаат“, додаде Закерберг.
Facebook оваа година беше погоден од повеќе скандали, од кои најголем беше оној со Cambridge Analytica, која без дозвола на корисниците ги користеше нивните податоци во политички цели за време на претседателските избори во САД во 2016 година. Неодамна во New York Times беше објавено истражување кое тврди дека раководството на Facebook знаело за руското мешање во претседателските избори во САД, но решило да не се меша и да го остави случајот непријавен.