Италијанскиот шампион денеска и официјално потврди дека досегашниот тренер Масимилијано Алегри ќе го напушти клубот по крајот на актуелната сезона.
Откако го презема кормилото во 2014 година, 51-годишниот Алегри го предводеше Јувентус до пет последователни титули во домашното првенство, а во меѓувреме четирипати го освои Купот на Италија.
Иако се забележа напредок во европските натпреварувања откако Конте го напушти Јувентус, сепак целта – освојување на Лигата на шампионите – и понатаму остана неостварена. Алегри успеа двапати да го однесе Јувентус до самата завршица, за двапати да загуби од шпански клубови, прво Барселона, а потоа и Реал Мадрид.
Трансферот на Кристијано Роналдо летово донесе дополнителен притисок за тимот од Торино да ја освои Лигата на шампионите, па сега раководството на „Старата дама“ ќе се обиде да донесе тренер кој ќе го подготви тимот за успех во најелитното натпреварување на стариот континент.