Францускиот фудбалер Килијан Мбапе беше отстранет од тренингот на Монако по расправија со соиграчот Андреа Раги.
Француските медиуми објавија дека Мбапе е чекор поблиску до излезната врата од Монако по караницата со Раги поради што порано го завршил тренингот и бил испратен дома.
Осумнаесетгодишниот напаѓач прво одбил да го напушти теренот по расправијата со Раги, а потоа интервенирале членовите на стручниот штаб и го тргнале од теренот. Расправијата се случила во вторникот, а информациите за инцидентот се појавија дури денеска.
Француските медиуми наведуваат дека Мбапе се расправал и со тренерот Леонардо Жардим кој не го вклучи во екипата, заедно со Раги, пред натпреварот со Мец.
„Наша должност сега е да го заштитиме Мбапе“, рече Жардим во врска со непојавувањето на младата фудбалска ѕвезда во игра.
Мбапе наводно веќе решил да премине во ПСЖ кој подготвува понуда вредна 178,4 милиони евра. Ако се случи трансферот, Мбапе ќе стане вториот најскап играч на светот откако Нејмар неодамна премина во ПСЖ за 200 милиони евра.
