Руски воени советници се присутни на теренот во Сирија, меѓутоа вооружените сили на Руската Федерација нема да учествуваат во антитерористичка операција во ова земја, изјави рускиот премиер Дмитриј Медведев во интервју за германскиот дневен весник Handelsblatt.
„Ние не сакаме да учествуваме во копнена операција, таму има само наши советници“, вели рускиот премиер, кој беше на претседателската должност во периодот од 2008 до 2012 година, кога повторно го замени на чело на владата актуелниот шеф на државата Владимир Путин.
Притоа Медведев истакнува дека операциите на руските воздухопловни сили во Сирија „немаат неограничен карактер“.
„Операцијата, секако е привремена, таа во прв ред е од локална природа, со користење на авиони и во некои случаи проектили (истрелани од подморници и бродови во Средоземното и Каспиското Море). Инаку кажано, таму гледаме многу важна, но истовремено и локална задача“, појаснува.
Премиерот потсетува дека „Русија е инволвирана во сирискиот конфликт за обезбедување на своите национални интереси“. Притоа Медведев појаснува дека станува збор за борбата со верските екстремисти.
„Знаеме дека оние што заминале во Сирија, а такви ги има барем неколку илјади луѓе, бројките се различни, затоа што секако не можеме да знаеме за сите, ќе се вратат како зомби убијци кои ќе го прават она што порано го правеа на Кавказ, во Москва и во други градови, она што го сторија во Париз, во САД, всушност по целиот свет“, вели Медведев..
„Затоа рускиот претседател одлучи да одговори на барањето на сирискиот претседател и беше донесена одлуката да се учествува во таа борбена операција“, ги појаснува рускиот премиер мотивите на Москва за преземање на воздушните удари врз позициите на екстремната сунитска група Исламска држава на сириското боиште.
Според процената на руското разузнавање, најмалку четири илјади лица од претежно муслиманските кавкаски републики и другите централно азиски земји од поранешниот Советски сојуз заминале на сириското боиште во редовите на Исламската држава.
Кавкаскиот емират е најозлогласената терористичка организација којашто дејствува на Северен Кавказ. Беше прогласен во 2007 година и ја презема одговорноста за повеќето големи терористички напади во Русија во којашто загинаа стотина луѓе, меѓу другите и експлозијата на меѓународниот терминал на московскиот аеродром Домододево во 2010 година.
Според руската Федерална служба за безбедност (ФСБ), повеќето од командантите на Емиратот Кавказ годинава ѝ изразиле лојалност на џихадистичката Исламска држава.