Mercedes ги објави фотографиите и техничките детали од најнеобичниот модел досега кој некогаш ја носел ознаката Maybach.
Без разлика дали станува збор за посебна автомобилска марка или новиот суперлуксузен подбренд на Mercedes, името Maybach секогаш се поврзува со луксузни лимузини.
Овој пат, Mercedes во едно возило ги спои луксузот карактеристичен за Maybach и теренските можности на G класата. И тоа не било која G класа, туку нејзината екстремна офроуд верзија со зголемено растојание од тлото и масивни тркала.
Maybach G650 Landaulet има отворен заден дел, па привилегираните патници кои седат позади можат да уживаат како да се возат во кабриолет. Овој дел од кабината по потреба може да се прекрие со платнен кров, со што патниците се заштитени од временски (не)прилики, но и од љубопитни погледи.
Во споредба, со стандардната G класа, G650 Landaulet има продолжено меѓуосовинско растојание за 578 mm, а на местото на задната клупа се наоѓаат две седишта-фотелји со масажна функција позајмени од S класата.
Платнениот кров автоматски се спушта и подига со притискање на копче, а за дополнителан приватност тука е и стаклената преграда помеѓу предниот и задниот дел од кабината.
Сепак тоа што го издвојува G650 Landaulet од останатите Maybach модели до новата генерација се неговите извонредни теренски способности. Растојанието од тлото е дури 450 mm, a автомобилот е поставен на 22 инчни тркала со димензии на гуми 325/55 R22.
За погонот е употребен истиот мотор кој го користи Mercedes-Maybach S650 Cabriolet - V12 битурбо со 630 КС и дури 1.000 Nm вртежен момент.
Mercedes-Maybach G650 Landaulet ќе ја има официјалната премиера на претстојниот саем во Женева, шо што ќе стигне во салоните.
Цената не е уште соопштена, а неофицијално се спомнува дека ќе биде поскап и од G63 кој чини 450.000 евра.