Како што Mercedes ја проширува својата понуда на нови модели, така расте и бројот на AMG автомобили со високи перформанси на германскиот автомобилски гигант.
Сепак, AMG третманот не е предвиден за секој Mercedes автомобил. Motor Trend пишуваа дека два модели дефинитивно се исклучени од таквите планови, а станува збор за Mercedes B-Class и електричниот SUV EQC.
Списокот е краток и не е неочекуван. Имено, од B-Class, претставник на MPV сегментот што е типичен семеен автомобил, не се очекува да има спортска верзија. За оние кои го сакаат спортскиот имиџ, Mercedes го нуди пакетот AMG Line што на ова возило му дава колку-толку спортски изглед, без дополнителна „доза“ моќност.
Во врска со електричниот модел EQC, шефот на AMG одделението Тобијас Моерс потврди дека ни овој автомобил нема да има класична AMG верзија, но на купувачите ќе им се понуди стилскиот AMG Line пакет со спортски естетски додатоци, поголеми алуминиумски фелни и нископрофилни пневматици.
Покрај тоа, не треба да заборавиме дека стандардната верзија на EQC има доволно моќен погонски систем што дава вкупно 407 коњски сили и максимален вртежен момент од 765 Nm, па благодарение на тоа, автомобилот забрзува од 0 до 100 км/ч за 5,1 секунди.
