Познатата американска актерка Мерил Стрип на доделувањето на Златните глобуси одржа многу емотивен шест минутен говор во кој предупреди на аномалиите во американското општество и индиректно го критикуваше Доналд Трамп.
Иако актерката не го именуваше Трамп директно, својот говор го искористи за критика на неговото однесување и политики. Актерката која има три Оскари во кариерата, смета дека идниот претседател го одбрува насилничкото однесување.
Стрип вели дека била шокирана кога републиканскиот кандидат во текот на кампањата, го исмеваше репортерот со инвалидитет кој во својата кариера има освоено Пулицер.
„Срцето ми се скрши кога го видов тоа и таа сцена уште не можам да ја исфрлам од главата бидејќи тоа не беше нешто од филм туку нешто од реалноста. Тоа им дава дозвола на другите да се однесуваат на истиот начин. Непочитувањето предизвикува непочитување, насилството потикнува насилство“ - вели актерката.
Таа вели дека сите губиме кога моќните ја користат својата позиција за да ги малтретираат другите.