Околу 600 до 700 мигранти кои вчера илегално ја преминаа македонско-грчката граница кај гевгелиското село Моин се вратени во Грција, информираат од Министерството за внатрешни работи.
Мигрантите се упатиле од кампот Идомени на грчка територија и границата ја минале во делот каде што не била поставена жичена ограда.
Грчките новинари и фоторепортери кои беа приведени, бидејќи заедно со мигрантите илегално ја минаа границата, како што информираат од МВР, се ослободени и на 28 новинари и фоторепортери издаден им е платен налог за илегално преминување на границата од 250 евра.
Дел од мигрантите кои се наоѓаат во кампот во Идомени илегално ја преминаа границата, а тројца Авганистанци утрото беа најдени мртви во Сува Река, близу Гевгелија.
