Министерката за култура, Елизабета Канческа - Милевска денеска три и пол часа беше распит во Специјалното јавно обвинителство. Како што изјави Министерката по распитот, таа била повикана во Обвинителството како сведок за некој од случаите кои ги отвори ова Обвинителство.
„Во Специјалното јавно обвинителство бев дојдена во функција на сведок. Сакам да го изразам моето задоволство за поканата од страна на Специјалното јавно обвинитлство каде што имав можност да го потенцирам законското работење на Министерството за култура. Сепак истрагата е од таен карактер, јас не сум овластена да давам изјави. За сè останато може да се јавите во СЈО“, изјави кратко Канческа Милевска.
Засега не е познато за кој случај сведочела Каческа - Милевска, иако нејзиниот глас можеше да се слушне и во објавените прислушувани разговори од страна на опозицијата.
Пред нејзе, од Специјалното јавно обвинителство излезе бизнисменот Орце Камчев кој не даде никаква изјава за медиумите. За Камчев не се знае ниту во какво својство е викнат во СЈО, дали како осомничен или сведок.
Специјалната јавна обвинителка се појави во Обвинителството, еден час и половина откако започна распитот на Канческа - Милевска, односно околу 13:30 часот. Изјави дека не е во тек со тоа кој е дојден денеска распит, но потврди дека овие денови треба да се појават поголем број лица во ова Обвинителство.
Месецов во СЈО се појавија и поранешната Министерка за внатрешни работи, Гордана Јанкулоска, шефот на кабинетот на поранешниот директор на УБК, Тони Јакимовски, поранешната пратеничка и сега член на ДИК, Силвана Бонева и други јавни личности.
Од СЈО нема детални информации за распитите бидејќи постапките се тајни.
Обвинителството сè уште нема покренато ниту едно обвинение.
