Ерменецот во редовите на Интер има јасна цел за сезонава, а тоа е освојување на Скудетото. Најголем конкурент на патот до него гледа во Јувентус.
Хенрих Мхитарјан не крие за што игра сезонава. Неговиот тим е лидер во Серија А и на сите им е јасно дека атакува на Скудетото, иако од таборот на „Нераѕурите“ тоа јавно не го кажуваат. Поранешниот ерменски репрезентативец токму тоа го направи.
„Од Јуве велат дека нивната цел е четвртото место. Станува збор за стратегија. Тие всушност целат на титулата, но сакаат притисокот да го префрлат на нас. А, за нас целта е јасна: втора ѕвездичка“, рече тој говорејќи за La Gazzetta dello Sport.
Интер досега има 19 освоени титули шампион на Италија, а му треба уште само една за на дресовите да може да ја стави втората ѕвездичка. Јуве има 36 титули и затоа има три ѕвездички. Ѕвездичка има уште само Милан, исто една бидејќи и тој има 19 титули. Никој друг нема ѕвездичка, а најблиску е Џеноа со 9 титули, па Торино, Болоња и Про Верчели со по 7. Ѕвездичка се доделува на секои 10 освоени титули.
По 18 кола во калчото лидер е Интер со 45 бодови, два повеќе од Јувнетус, кој се чини му е единствен конкурент со оглед на тоа што третопласираниот Милан заостанува 9 бода.
