За милиони луѓе ширум светот е незамисливо да го почнат и издржат денот без кафе, а за оние кои сакаат да пијат и по неколку кафиња во денот, научниците имаат добра вест.
Резултатите од едно најново истражување покажаа дека дневно може да испиете и до 25 шолји кафе без страв дека ќе го загрозите срцевото здравје.
Претходни истражувања сугерираа дека кафето го зголемува ризикот од срцев и мозочен удар, па научниците предупредуваа да внимавате колку кафе пиете во текот на денот.
Меѓутоа, најновото истражување спроведено во Велика Британија на повеќе од 8.000 испитаници покажа дека слободно може да испиете и до 25 шолји кафе дневно.
Истражувањето беше делумно финансирано од Здружението за срцево здравје во Велика Британија (BHF), а резултатите беа претставени на конференцијата на Британското здружение на кардиолози.
Истражувачите од Универзитетот Квин Мери во Лондон поделиле 8.402 испитаници во три групи. Во првата група имало луѓе кои пијат помалку од една шолја кафе дневно, во втората луѓе кои пијат една до три шолји кафе днавно и во третата луѓе кои пијат повеќе од три шолји кафе дневно.
Испитаниците во третата група во просек пиеле по пет шолји кафе дневно.
Резултатите од истражувањето покажаа дека и оние кои пиеле и до 25 шолји кафе дневно немале поголем ризик од запушување на артериите во споредба со оние кои пиеле помалку од едно кафе во денот.
„Без оглед на огромната популарност на кафето ширум светот, има многу истражувања што може да ги разубедат луѓето да не пијат кафе и да не уживаат во него. Иако со нашето истражување не можеме да ја докажеме причинско-последичната поврзаност, анализите сепак покажуваат дека кафето не е така лошо за артериите како што се сугерираше претходно“, вели Кенет Фунг од Универзитетот Квин Мери во Лондон.