Претседателот на Зимбабве, Роберт Мугабе денеска полни 93 години и е најстариот активен шеф на една држава, пренесуваат светските агенции.
Мугабе пред роденденот рекол дека нема намера да се повлече од власт поради тоа што смета дека моментално нема ниеден „прифатлив“ наследник. Пред неколку месеци тој најави дека ќе се кандидира на наредните избори планирани за 2018 година.
Претседателот на Зимбабве, роден на 21 февруари 1924, беше претседател на владата од 1980 до 1987 година, а од 1987 па досега е шеф на државата.
Контроверзниот Мугабе, националниот херој на ослободувањето на Зимбабве од колонијалното владеење, често е обвинуван за насилно гушење на опозицијата и уништување на земјата.
Познат е и по навредите упатени кон Западот, своите противници и новинарите. Мугабе поради начинот на владеењето и одговорноста за состојбата во Зимбабве каде владее со „цврста рака“, од 2002 година е изложен на европски и американски санкции.