Сеул, 12 октомври 2018 (МИА) - „Севернокорејскиот лидер Ким Џонг-ун планира да ги стави надвор од употреба сите нуклеарни оружја, материјали и постројки, со цел да се постигне „целосна“ денуклеаризација“, изјави јужнокорејскиот претседател Мун Џе-ин.
Мун исто така додаде дека Пјонгјанг и Вашингтон имаат работни консултации за да се договорат за вториот самит на севернокорејскиот лидер и американскиот претседател, откако ќе завршат изборите во САД.
По третиот состанок со Ким во Пјонгјанг во септември, Мун изјави дека Северна Кореја е подготвена да покани меѓународни експерти да го надгледуваат затворањето на полигонот за ракетни тестирања и дека ќе го затвори главниот нуклеарен комплекс, ако Вашингтон преземе реципрочни акции.
Мун во интервју за BBC оцени дека тие акции би можеле да вклучат отворање американска канцеларија за врски во Северна Кореја, доставување на хуманитарна помош и размена на економски експерти.