Рамштајн, државен непријател?

Белоруските власти заклучија дека германскиот хард рок бенд Рамштајн е ни помалку ни повеќе туку закана за државата па предложија забрана за нивниот концерт кој треба да се одржи во Минск, бидејќи тоа би била „скапа грешка за земјата“.

Белорускиот одбор за морал даде стручно мислење: Музиката на Рамштајн може да го уништи белорускиот државен систем, опишувајќи го тој опасен „елемент“ како, цитираме, пропаганда на насилство, мазохизам, хомосексуалност и други абнормалности.

Инаку, Одборот за морал е државна цензорска институција формирана минатата година, на чие чело е писателот Николаи Чегринез, а неофицијалниот опис на нејзината работа е - ограничување на слободата на говор.

После ваквите изјави на Одборот за морал, се дигна прашина па реагираше и белорускиот амбасадор во Германија Андреи Гиро кој изјави дека мислењето на одборот повеќе може да се категоризира како личен став, и дека нема условувачки карактер, информира TheGauntlet.com.

Картите за концертот на контроверзниот бенд кој треба да се одржи на 7. март веќе се распродадени. На веста дека концертот е забранет, организаторите изјавија дека немаат никакви информации дека Рамштајн во Минск планирале ширење на насилни, перверзни и груби пораки или величење на нацистичката идеологија.

Групата е формирана истата година кога претседателот на Белорусија Александар Лукашенко дојде на власт во оваа земја.

Б.И. | Кајгана