Англија синоќа ја понижи Бугарија со 6:0 среде Софија, но англиските фудбалери заминаа дома длабоко навредени на расна основа, а добија и нацистички пораки од домашната публика.
Бугарија има како никогаш досега слаба репрезентцаија. По 8 кола немаат победа, само три нерешени од кои два со Црна Гора. Јасно беше дека од Англија ќе загубат, но она што го приредија на трибините ќе ја натера УЕФА уште долго да се занимава со нашиот источен сосед.
Нацистичкото минато на Бугарите излезе на виделина синоќа на „Васил Левски“ стадионот кога во повеќе наврати дел од навивачите беа фатени како го поздравуваат Фирерот. Бугарија во Втората светска војна беше сојузник со Германија и имаше окупирано територии од соседните земји каде што правеше невидени злосторства, вклучително и во Македонија.
Црномурестите фудбалери во репрезентацијата на Англија беа цел и на расистички скандирања, па во два наврата главниот судија го прекинуваше натпреварот. Ниту апелите на капитенот Ивајло Попов, кој отиде да разговара со проблематичната група навивачи, не вродија со плод.
Англија однесе голема победа, а Бугарија ја дека драконска казна од УЕФА. Покрај парична, јасно е дека Бугарите ќе добијат и забрана за играње пред публика, а ништо чудно да мора да играат и на неутрален терен.
За бугарскиот голман Пламен Илиев немало ништо лошо во однесувањето на навивачите: „Доколку зборувам искрено, верувам дека навивачите се однесуваа добро. Немаше никакви навреди, гостите ги преувеличуваат работите. Публиката беше на ниво, не слушнав ниту еден лош збор упатен кон нивните или нашите играчи“.
И бугарскиот селектор, легендарниот Красимир Бал'ков не смета дека се виновни домашните навивачи: „Лично јас не слушнав ништо. Видов дека судијата го прекина натпреварот, но морам да нагласам и дека лошото однесување не беше само од нашите навивачи туку и од англиските кои ја свиркаа бугарската химна, а во вториот дел дофрлаа погрдни зборови кон нашите навивачи“. Вистина е дека англиските навивачи возвраќаа на нападите од бугарските нацисти.
