Наставникот Питер Табичи е добитник на годинешната Награда за најдобар наставник во светот и на чек од милион долари, пренесува BBC. Станува збор за наставник кој поголем дел од своите примања ги донира за сиромашни деца.
Престижното признание Global Teacher Prize е доделено во Дубаи, а водител на програмата беше познатиот актер Хју Џекмен. Наградата и чекот од милион долари му се врачени на Табичи кој работи како наставник по математика и физика во државно средно училиште во оддалечено и неразвиено место во Кенија.
Тој на доделувањето изјави дека за прв пат патува со авион и дека наградата му претставува голема чест, но и обврска да продолжи да се грижи за децата во училиште во кое има само еден компјутер, а повеќето од учениците се сирачиња.
Тој најави дека парите од наградата ќе ги употреби за подобрување на условите во училиштето, како и за сиромашните во Кенија. Покрај хуманоста на овој наставник, тој е исклучително квалитетен едукатор. Најдобри сведоци за тоа се неговите ученици кои редовно освојуваат награди на натпревари во Кенија на регионално ниво, иако учат во училиште без библиотека, лабораторија и соодветен пристап до интернет.
Претседателот на Кенија, Ухуру Кенјата му честиташе на посветениот наставник и порача дека приказната за Табичи ја претставува приказната за Африка и надежта за новите генерации.
