Граѓанското движење „Протестирам“ за денеска најави протести во повеќе градови низ Македонија, а истовремено протести најавија од Граѓанското движење за одбрана на Македонија (ГДОМ).
„Протестирам“ бара укинување на аболицијата и создавање на услови за фер и демократски избори, додека ГДОМ бара одржување на изборите на 5 јуни.
Според соопштението на „Протестирам“, денеска ќе има протести во Скопје, Штип, Велес, Тетово, Битола, Струмица, Радовиш и Гевгелија. Приклучување кон протестите најавиле и земјоделци од Крива Паланка и Облешево кои планираат блокади на патиштата.
Здружението ГДОМ најави протести во Битола, Штип, Велес, Делчево, Гевгелија, Струмица, Куманово, Радовиш и Тетово.
„Стоп за деструктивните сценарија, доста ни е од наметнатата криза. Избори мора да има, народот мора да го искористи демократското право да одлучува за својата иднина“, порачуваат од ГДОМ.
