Арја Пермана има 10 години и тежи 192 килограми. Се смета дека тој е најдебелото дете во светот, а родителите, загрижени за неговиот живот, го ставија на диета со кафеав ориз.
Детето не може да се движи самостојно, затоа не оди на училиште. Неговите родители не можат да обезбедат облека за него поради тежината. Тој јаде по пет оброци на ден.
„Постојано е гладен и може да изеде оброци за двајца возрасни луѓе одеднаш. Секогаш е уморен и се жали на недостиг на воздух. Само јаде и спие, или седи во базенчето со часови. Нема поголема болка од таа да го гледате сопственото дете како страда. Мојот син не оди на училиште бидејќи не може сам да се движи и му треба поголем простор“, раскажува мајката.
Детето е родено со нормална тежина, но по втората годинка неговиот апетит се зголемил и тогаш почнал да добива на тежина. Докторите не можат дa откријат што не е во ред со него, прегледан е од неколку различни доктори во Индонезија, но сите креваат раменици.
„Немам доволно пари за да купам храна за големиот апетит на Арја. Позајмувам за да може тој да јаде. Не можам да дозволам да гладува. Сега сум малку заглавен со парите и не можам да си дозволам скапи болници. Но, се надевам дека мојот син еден ден ќе биде сосем нормален“, вели таткото Аде, кој работи како земјоделец.
Беспомошните родители сега го ставија синот на диета со кафеав ориз, со надеж дека ќе успеат да ја контролираат неговата тежина, пишува Metro.
