Најпознатиот снајперист во американската историја, веројатно лажел за одликувањата што ги добил во текот на кариерата, покажуваат документите за неговата служба, пишуваат американските медиуми.
Крис Кајл во својата автобиографија врз која потоа беше направен успешниот филм со Бредли Купер во главната улога, пишува дека освоил две Сребрени ѕвезди и пет Бронзени ѕвезди во текот на неговата 10 годишна воена служба. Сребрената ѕвезда е престижна награда која се доделува за храброст на военото поле.
Снајперот на морнаричките „фоки“ во својата книга пишува „Ќе ја завршам кариерата како припадник на фоките со две Сребрени ѕвезди и пет Бронзени ѕвезди“.
Сепак документите од Морнарицата до кои дошол Intercept покажуваат дека тоа не е точно. Истото го потврдуваат и официјални претставници, кои објаснуваат дека припадникот на елитната единица добил една Сребрена ѕвезда и три Бронзени ѕвезди за храброст.
Intercept пишува дека поранешен припадник на „фоките“ изјавил дека елитната единица знаела дека податоците не се точни, но не сакале да интервенираат поради статусот на ѕвезда што го имал Кајл и поради тоа што ја претставувало единицата во подобро светло.
И покрај тоа, медиумите се согласуваат дека снајперистот е вистински херој.
