Авион на компанијата Singapore Airlines на лет за Милано, се запалил утрово откако принудно слетал на сингапурскиот аеродром од кој полетал. Во инцидентот нема повредени, соопштија властите.
Леталото се вратило на аеродромот, по предупредувањето за ниско ниво на масло во моторот, но по слетувањето се запалил десниот мотор на овој Boeing 777-300ER, пишува Reuters.
Противпожарната служба, набргу потоа го изгаси пожарот, а никој од 222 патника и 19 членови на екипажот, не е повреден во инцидентот.
Летот SQ368 на линијата Сингапур Милано, полетал во 2.05 часот, но по извесен период летање, пилотот објавил дека дошло до дефект на моторот и дека ќе се врати назад во Сингапур.
на видеата се гледа како гори крилото на десет години стариот авион, а противпожарните екипи брзаат да реагираат. Едно од видеата ја покажува и сцената од застрашувачката перспектива на патник што седи покрај крилото.