Минатата година BBC ја емитуваше серијата Planet Earth II, што е продолжение на една од најуспешните документарни серии со препознатливиот глас на нараторот Сер Дејвид Атенборо.
Со надеж дека ќе го повтори успехот, BBC го најави продолжението и на серијата Blue Planet од 2001 година која ги истражува светските океани.
„Воодушевен сум што сум дел од новото истражување на подводниот свет кој го покрива најголемиот дел од нашата планета, а и понатаму е слабо познат“ - вели Атенборо.
Продуцентот на серијата Џејмс Ханиборн вели дека сега е вистинскиот момент за продолженија, бидејќи новите откритија даваат сосема нова перспектива на гледањето на подводниот живот.
„Blue Planet се потпира на тие откритија, посетува нови неверојатни места и го следи однесувањето на неверојатните суштества“ - вели Ханиборн.
Современата технологија овозможува снимање на неверојатни кадри кои се забележуваа и во Planet Earth II, а во серијата ќе се појават и некои многу интересни подводни суштества. Blue Planet II треба да се емитува кон крајот на годината.
