Немили сцени се случуваа на стадионот „Пољуд“ во Сплит по полуфиналето од Купот на Хрватска меѓу Хајдук и Динамо.
Гостите од Загреб, вторпат во само четири дена, беа подобри од Хајдук среде Сплит. Со голот на Сандро Куленовиќ славеа со 1:0 и се пласираа во финалето, а пред четири дена со ист резултат „Модрите“ победија и во првенството.
На Хајдук овојпат не му помогна ниту тоа што Иван Перишиќ, легендата на хрватскиот фудбал, заигра за прв пат откако потпиша договор со клубот. Тој влезе во игра во 72. минута и предизвика ерупција од воодушевување кај навивачите на „Пољуд“.
Од македонските фудбалери, Александар Трајковски беше на клупата на Хајдук и доби шанса од 65-тата минута, додека Стефан Ристовски почна за Динамо и играше до 90-тата кога беше заменет за да се задржи време. Аријан Адеми не беше воопшто во составот на „Модрите“.
По завршувањето на натпреварот, навивачите на Хајдук, популарните Торцида, револтирани од резултатот, бесот сакаа да го искалат врз гостинските нвивачи.
Ја пробија заштитната ограда и полицискиот кордон пред северната трибина и влегоа на теренот. Фудбалерите на двата тима веднаш избега во соблекувалните.
Толпата тргна кон јужната трибина, но потоа следуваше реакцијата на специјалните полициски сили, кои ги опкружија хулиганите и успеаја да ги вратат на северната трибина, по што тензиите стивнаа.
Динамо по 24 пат ќе игра во финалето на националниот Куп, каде досега освои рекордни 16 титули. Противник ќе му биде Ријека, која по деветти пат ќе игра финале, во кое ќе се бори за седмата титула.