Синоќа во НБА лигата се одиграа четири натпревари а честа на домаќините успеа да ја одбрани само тимот на Вашингтон Визардс, кој стигна до неочекувана победа против Лос Анџелес Клиперс. Сепак, натпреварот на вечерта беше одигран во Орландо, каде домашниот тим загуби со последниот шут на натпреварот.
Тимот на Торонто Репторс потешко од очекуваното стигна до победа против Орландо Меџик со резултат 93:91.
Оваа сезона сите тимови играат со ултрависоко темпо, но синоќа Репторс и Меџик го намалија темпото, што може да се заклучи и од конечниот резултат. Кавај Ленард го заврши мечот со 18 поени и 6 скока, со што беше најдобар поентер кај гостите, додека Паскал Сиакам продолжи со одличните партии сезонава и забележа 15 поени и 9 скока. Но, најважниот потег на вечерта го направи Дени Грин, кога го погоди последниот шут на натпреварот за да му донесе победа на тимот на Торонто Репторс.
Кај домаќините импресионираа двајца играчи: Еван Фурние и Никола Вучевиќ. Фурние постигна 27 поени и погоди четири тројки, додека Вучевиќ уште еднаш забележа дабл-дабл учинок, овојпат со 14 поени и 18 скока.
Останати резултати:
Вашингтон Визардс – Лос Анџелес Клиперс 125:118
Мајами Хит – Бруклин Нетс 92:104
Њујорк Никс – Портланд Трејл Блејзерс 114:118