Синоќа се одиграа 11 натпревари во НБА лигата и тие донесоа многу возбуда за љубителите на добрата кошарка. Приказната на вечерта беше натпреварот помеѓу Тимбервулвс и Пеликанс – двата конкуренти за плејоф позиција во Западната конференција.
Тимот на Минесота Тимбервулвс стигна до триумф на домашен терен против Њу Орлеанс Пеликанс со резултат 107:100.
Откако си замина Џими Батлер, составот на Минесота Тимбервулвс изгледа ослободен од товарот и притисокот кој со себе го носеше ветеранот. Неговото заминување отвори простор за Карл-Ентони Таунс и Ендру Вигинс да покажат што знаат, а и двајцата синоќа одиграа одлични натпревари.
Таунс беше најдобриот поединец на Тимбервулвс во синоќешниот натпревар против Пеликанс. Тој забележа 25 поени и 16 скока, а беше и непогрешлив од линијата за слободни фрлања. Неговиот соиграч Вигинс шутираше неефикасно, но сепак стигна до 23 поени, додека Џеф Тиг додаде 14 поени и 14 асистенции.
Предводник на тимот на Пеликанс беше Ентони Дејвис, како и обично. За 40 минути на теренот тој забележа 29 поени, 11 скока и 4 блокади, но тоа не беше доволно победа, иако имаше солидна поддршка од стартната петорка.
Останати резултати:
Орландо Меџик – Филаделфија Севентисиксерс 111:106
Вашингтон Визардс – Кливленд Кавалирс 119:95
Бостон Селтикс – Чикаго Булс 111:82
Њу Џерси Нетс – Мајами Хит 107:120
Торонто Репторс – Детроит Пистонс 104:106
Милвоки Бакс – Мемфис Гризлис 113:116
Оклахома Сити Тандер – Њујорк Никс 128:103
Далас Маверикс – Јута Џез 118:68
Феникс Санс – Сан Антонио Спарс 116:96
Лос Анџелес Лејкерс – Портланд Трејл Блејзерс 126:117