Бразил ја декласира Аргентина со 3-0, во големото јужноамериканско дерби, кое се одигра во рамките на 11-то квалификациско коло за пласман на Мундијалот во Русија. Победи во ова коло забележаа селекциите на Уругвај, Парагвај и Венецуела, додека Колумбија и Чиле одиграа без голови.
Нејмар одигра уште еден брилијантен меч и е најзаслужен за триумфот против најголемиот ривал. Аргентина нема гостинска победа над Бразил цели 46 години, последен пат „гаучосите“ победиле на теренот на овој противник на 4 март 1970 година.
Поразот на Бразил го најави Кутињо во 24 минута, кога со фантастичен гол од 17 метри го отвори резултатот. Во финишот на полувремето Нејмар погоди за 2-0, а конечниот удар на Аргентина и го зададе Паулињо во 59 минута.
Последен пат Бразил со 3-0 славел против Аргентина во 2007 година на Копа Америка.
Голот што го постигна Нејмар беше неговиот 50-ти за Бразил. Играчот на Барселона за националниот тим дебитирал во 2010 година и има одиграно 74 натпревар.
Нејмар на вечната листа се наоѓа на четвртото место, повеќе голови од него имаат постигнато Ромарио (55), Роналдо (62) и рекордерот Пеле (77).
На другите натпревари Уругвај славеше над Еквадор со 2-1, со головите на Коатес и Ролан, Перу неочекувано лесно се справи со Парагвај и победи 4-1, а Венецуела ја декласира Боливија со 5-0. Натпреварот Колумбија-Чиле заврши 0-0.
Бразил е прв во групата со 24 бодови, пред Уругвај кој има 23, трета е Колумбија со 18, а зад неа со бод помалку се Чиле и Еквадор. Аргентина е шеста со 16 бодови и има еден односно два бода повеќе од Парагвај и Перу, а на дното се Венецуела со пет и Боливија со четири бода.
