Демонстрациите во Чиле ставија крај на фудбалскате сезона и на шест кола до крајот Федерацијата реши лидерот на табелата да го круниса во шампион.
Фудбал во Чиле не се игра уште од средината на октомври кога првенството беше прекинато поради масовните демонстрации кои прераснаа во големи нереди и судири со полицијата.
Имаше обид првенството да продолжи, еден натпревар успешно се одигра (Кобресал против Унион Еспањола), прекинат беше Унион Ла Калера - Депортес Икике, додека останатите не ни почнаа.
Токму затоа, синоќа Асоцијацијата на првата и втората лига донесе одлука првенството да заврши со моменталниот пласман бидејќи услови за доигрување нема.
Шампион е бранителот Универсидад Католика кој и онака има 13 бодови предност пред второпласираниот Коло-Коло и 15 пред третиот тим на Палестино. Токму тие три клубови ќе го претставуваат Чиле во Копа Либертадорес наредната сезона со тоа што Палестино ќе почне од квалификациите.
За Универсидад Католика ова е титула број 14.