Децата од 90-тите ги возбуди веста за реанимирањето на серијата „Beverly Hills, 90210“ под нов наслов „BH90210“, но новата серија не е баш враќање на старата, туку серија за актерите кои размислуваат да ја вратат во живот серијата што згасна пред 19 години.
Четвртата епизода од новата серија што се емитува на Fox ја гледале само околу 1 милион гледачи, што е пад на и онака слабата гледаност на серијата воопшто.
Пред да почне да се емитува серијата, продукцијата наведуваше дека дејството ќе се врти околу старите ликови - Бренда (Шенон Доерти), Дона (Тори Спелинг), Кели (Џени Гарт), Брендон (Џејсон Пресли), Стив (Ијан Зиринг), Дејвид (Брајан Остин Грин) и Андреа (Габриела Картерис), а она што гледачите го добија е слатко-горчлива носталгија и приказна во која се мешаат фикцијата и реалноста.
Дури и спомнувањето на Лук Пери, актерот кој го играше ликот на проблематичниот Дилан Мекеј и почина набрзо по соопштувањето на веста за реанимирање на серијата, не помогна за подобрување на рејтинзите на серијата.
Напротив, целата сцена во која му се оддаде почит на Пери, иако беше трогателна, фановите ја доживеаја како очајнички обид да се „исцица што може“ од нивната носталгија кон серијата и љубовта кон ликот.
Не помогна ни тоа што Спелинг и Гарт упорно го спомнуваат Пери во нивните интервјуа, иако беше познато дека актерот немал желба, ни намера да се приклучи на проектот.
Пери имаше успешна улога во серијата „Riverdale“ кога му беше понудено да се врати во старата екипа, а неговите поранешни колешки тврдат дека имале целосна поддршка од него за развивање на проектот.
