Компанијата HMD Global повторно го разбуди името Nokia на светските пазари за смартфони. Новиот модел X7 вчера беше претставен во Кина и денеска веќе започна со продажба. Овој флегшип телефон со 6,2-инчен екран ќе се продава по многу пристапна цена на азискиот пазар, а набрзо пристигнува и во Европа.
Овој нов модел, кој на кинескиот пазар ќе се продава под името Nokia X7, во Европа, САД и останатите пазари ќе го носи името Nokia 7.1 Plus.
Најновиот флегшип телефон од производната линија на Nokia доаѓа со 6,2-инчен LCD екран со 1080p, кој го има и веќе популарниот „notch“ – главното обележје на флегшип телефоните на поголемите производители на смартфони. X7 е опремен со Snapdragon 710 процесор и доаѓа во две верзии, едната со 4GB RAM и 64GB внатрешна меморија а другата со 6GB RAM и 128GB внатрешна меморија.
Неговата батерија од 3.500 mAh поддржува брзо полнење, што стана составен дел од скоро секој нов флегшип модел. Nokia X7 има и 12-мегапикселна главна камера со сензор за длабочина од 13 мегапиксели.
Новиот X7 ќе работи со оперативниот систем Android 8.1, но и понатаму ќе може да презема апдејти за Android One, додека компанијата работи и на апдејтот на Android 9 Pie. Цената на телефонот во Кина е 1.699 јени, односно 246 американски долари.