Уште пред две години Kawasaki Ninja H2R ја изненади конкуренцијата - додека голем дел од суперспортските мотоцикли располагаа со околу 200 коњски сили, Ninja H2R се издигна на 300 коњи. Одличниот моторџија Кенан Софуоглу реши да ги тестира максималните перформанси на овој ѕвер на две тркала.
Овој модел на Kawasaki не е наменет за јавните патишта (за разлика од неговиот послаб брат H2), па брзинскиот тест, Софуоглу го изведе на доволно долг затворен мост.
Токму Софуоглу е сопственик на брзинскиот рекорд на овој мотоцикл, а преку мостот успеа да постигне брзина од 400 километри на час.
„Кога ги прашав која е максималната брзина на овој модел рекоа дека е 380 километри на час. Сонот ми беше да достигнам 400 километри на час“ - изјави Софуоглу.
Овој феноменален возач во пробните возења достигнал до брзина од 390 километри на час, но на крајот сепак успеал да стигне до бројката 400. Подвигот и забрзувањето до 400 километри на час го остварил за само 26 секунди.
