Honda Civic Type R повеќе не е најбрзиот сериски модел со преден погон на Нирбургринг. Новиот рекордер во оваа категорија е Golf GTI Clubsport S кој ја помина легендарната патека за 7 минути и 49,21 секунди.
Најдоброто време со резултат 7:50.63, Civic Type R го имаше од март минатата година, а потоа управата на патеката воведе ограничување на брзината на одредени делови поради безбедносни причини и го оневозможи поставувањето нови рекорди.
Забраната неодамна беше укината, а Volkswagen тоа го искористи за да ја промовира специјалната верзија на Golf GTI Clubsport.
Во однос на стандардниот GTI Clubsport кој испорачува 265 коњски сили, Clubsport S има 45 коњи повеќе. Модификуваниот 2.0 литарски турбо бензинец сега развива 310 коњски сили со максимален вртежен момент од 380Nm.
Освен посилниот мотор, за ваквиот резултат на Нирбургринг е заслужна и помалата маса на автомобилот кој е за 30 килограми поевтин од регуларниот модел. Тоа е постигнато со отстранувањето на задната клупа од кабината и користењето на помал акумулатор.
Моторот е поврзан со 6-брзински мануелен менувач, а автомобилот е опремен со 19 инчни алу-фелни и полу-слик гуми. Освен тоа, Golf GTI Clubsport S има специјално прилагодена амортизација, која е наменета за возење на тркачка патека.
Volkswagen ќе понуди ограничена серија од 400 возила, од кои 100 се наменети за германскиот пазар, додека 150 примероци ќе завршат во Британија.