Вчерашниот пријателски натпревар помеѓу репрезентациите на Бразил и Камерун се покажа како кобен за Нејмар, кој по само шест минути игра мораше да го напушти теренот поради повреда. Бразил победи, но повредата на Нејмар е лош знак за ПСЖ, кој во репрезентативната пауза го загуби и Килијан Мбапе, исто така поради повреда.
Нејмар беше заменет со напаѓачот на Евертон, Ричарлисон, кој го постигна решавачкиот гол на натпреварот и донесе победа за Бразил, но тоа е мала утеха за селекторот Тите и неговиот колега од ПСЖ, Томас Тухел.
Бразил го победи Камерун со резултат 1:0, но победата беше засенета од повредата на најдобриот играч на репрезентацијата, Нејмар. Тој требаше да одигра само уште еден лесен натпревар за Бразил ама го истегна мускулот при еден шут во петтата минута и мораше да ја напушти играта.
„Нејмар почувствува дека се повреди и затоа ја напушти играта. Ќе ни треба повеќе време да направиме проценка на повредата. Ќе ја скенираме деновиве, но не би требало да се работи за сериозна повреда“, изјави докторот на бразилската репрезентација, Родриго Ласмар.
Единствениот гол на натпреварот го постигна неговата замена, Ричарлисон, кој сезонава игра во одлична форма и постојано го докажува тоа во националниот дрес. Пред крајот на полувремето, тој ја искористи укажаната шанса и го постигна третиот гол во шестиот настап за репрезентацијата.
Оваа повреда претставува уште еден во низата проблеми за ПСЖ бидејќи францускиот тим за време на репрезентативната пауза мораше да се соочи со фактот дека двајцата главни играчи – Нејмар и Мбапе – се враќаат повредени од настапите во националниот дрес. Мбапе доживеа повреда на рамото во пријателскиот меч против Уругвај и засега е непознато колку време ќе отсуствува од терените.