Наместо толку популарниот „notch“, дизајнерите на Huawei се решија да бидат малку покреативни од нивните конкуренти од телефонската индустрија и да вметнат мала, скоро незабележлива дупка во екранот на моделот Nova 4, кој ќе се појави на пазарот веќе од овој месец.
Според кинеските медиуми, Huawei Nova 4 би требало да биде претставен веќе на 17-ти овој месец, а новите рендери покажуваат како ќе изгледа овој уред.
Huawei не е единствениот производител кој работи на уред со новиот формат на дисплејот. Покрај тоа што го најави долго очекуваниот смартфон кој се витка, Samsung најави еден куп нови концепти за дисплејот на новите телефони, меѓу кои е и дисплејот наречен Infinity-O, кој има сличен дизајн како оној на Nova 4.
Се шпекулираше дека телефоните од производната линија Galaxy S10 ќе бидат првите кои ќе користат дисплеј со „дупка“, но како што стојат работите, Huawei ќе го претекне Samsung до ова достигнување.
„Дупката“ во екранот всушност не е вистинска дупка, туку во неа ќе биде сместена селфи камерата која кај минатогодишните модели на телефони се наоѓаше на „notch“-от на горниот дел од екранот.
Новите рендери го покажуваат изгледот на новиот Huawei Nova 4, кој ќе биде флегшип моделот на кинеската компанија за наредната година.