Наука

Новите скафандри за руските космонаути имаат само една маана

30. август 2019 - 15:17 | А.С.

Русија ги претстави новите скафандри за космонаутите во вселената, но најверојатно дизајнот ќе мора да претрпи измени.

Новите вселенски одела имаат една маана – го попречуваат остварувањето на една традиција што важи со децении: застанувањето по пат кон лансирната рампа за да може космонаутите да „пуштат вода“.

Прототипот Сокол-М беше дизајниран како замена за скафандрите што досега се користеа при лансирање кон Меѓународната вселенска станица во вселенското летало „Сојуз“.

Леталото „Сојуз“ што се користи од 60-тите полека ќе биде исфрлено од употреба и заменето во следните неколку години, со моделот „Федерација“.

Производителот на скафандрите, компанијата „Звезда“, соопшти дека оделата ќе бидат изработени од нови материјали и прилагодливи за различни величини.

Меѓутоа, новиот дизајн оневозможува да се изведе еден специфичен ритуал што го почна првиот човек во вселената, Јуриј Гагарин, кој морал да „се олесни“ на задното тркало на автобусот што го носел кон лансирната рампа во 1961 година.

Застанувањето со автобусот за да може космонаутите и астронаутите да уринираат на пат кон лансирната рампа Бајконур станало традиција и еден вид ритуал за среќа. Но, тоа нема да може да го прават во новиот скафандер.

Жените космонаути и астронаути не се обврзани да учествуваат во ритуалот, иако некои од нив носеле урина во садови и епрувети и ја истурале на задната гума, чисто „за среќа“.

„Не сум сигурен дека ќе може да ја продолжат традицијата, бидејќи новиот модел нема шлиц“, изјави директорот на „Звезда“ Сергеј Поздњаков.

„Ги добивме спецификациите за дијзанот. Не ни беше нагласено дека мора да има шлиц за уринирање. Ќе мора да се направат измени“, додаде тој.

Моделот Сокол-М има еден дијагонален патент, а моделот што се користи сега, Сокол-К, има V шлиц кај меѓуножјето.

Коментирај