Во рамките на есенската сезона на садење денеска на улицата „Максим Горки“ беше засаден дрворед од 18 висококвалитетни повеќегодишни садници од видот јапонски цреши (како донација од вработените во локалната канцеларија на Европската банка за обнова и развој во Република Северна Македонија).
„Во името на Град Скопје сакам да упатам благодарност до вработените во локалната канцеларија на ЕБОР за овој хуман гест кој значи многу за Град Скопје. Интензивно работиме на зголемувањето на зелените површини во Скопје, а оваа есен посебно внимание посветивме на обновување на постојните и формирање на нови дрвореди кои му се потребни на нашиот град“, истакна во своето обраќање градоначалникот на Град Скопје, Петре Шилегов.
„Ме радува фактот што дополнително многу општествено одговорни компании покажаа интерес за донации во делот на градското зеленило, што е само уште еден доказ дека сѐ повеќе се крева свеста за значењето на зелените површини за животната средина во градот“, нагласи градоначалникот.
„Овие убави дрвја ја симболизираат нашата релација со градот и придонесуваат за подобрување на квалитетот на воздухот во Скопје. Ова е приоритет за ЕБОР, кој веќе има инвестирано во поддршка на плановите на Градот за почист јавен превоз и работи со градските и општинските власти на Акцискиот план за „Зелен град“, кој воедно ќе понуди систематски решенија за нови инвестиции и политики“, изјави Анди Аранитаси, директор на ЕБОР Северна Македонија.
Фото: Град Скопје
