Шпанската компанија објави официјални фотографии од првиот свој SUV модел кој ќе се продава под името Ateca. По една година од концептот, компанијата го објави својот претставник кој ќе треба да се бори со Nissan Qashqai, Renault Kadjar, Mazda CX-5, Hyundai Tucson, Ford Kuga и сличните популарни SUV возила.
Seat малку го „омекна“ дизајнот на концептот и го прилагоди за сериско производство, па сега тркалата се намалени, надворешните ретровизори се зголемени, а спортскиот изглед му отстапи место на поконвенционалниот дизајн, карактеристичен за фамилијарните возила.
Моделот е поставен на модуларната MQB платформа на Volkswagen, а има должина од 4,36 метри, ширина од 1,84 метри и висина од 1,6 метри. Багажникот има капацитет од 510 литри кај верзијата со преден погон, или 485 литри кај 4х4 моделот.
Продажбата треба да стартува со септември низ Европа, а ќе биде достапен со неколку турбо мотори. Основниот бензинец ќе има 1,0 литарски мотор со три цилиндри и 115 коњски сили. Следен во понудата ќе биде 1,4 литарскиот мотор со 150 коњски сили, а понудата ќе ја комплетираат и трите дизел мотори, 1,6 со 115 коњски сили, како и 2.0 верзијата со 150 и со 190 коњски сили.
Сите верзии го имаат 6-брзинскиот мануелен менувач, додека посилните верзии се достапни и со автоматски 7-степен менувач со двојна спојка. Овој модел на Seat ќе биде опремен со разни современи технологии, меѓу кои е и онаа за автоматско сопирање при мали брзини, за да се избегне судар во градските услови на возење.
Меѓу другото Seat Ateca ќе има систем кој го одржува возилото во лентата во која вози, технологија за читање на знаците, сензори за возило во мртвиот агол, како и сензори кои ќе го предупредуваат возачот дека доаѓа возило кога тој излетува од паркинг во рикверц.
Светската премиера на овој модел ќе биде на автомобилскиот саем во Женева кој ќе се одржи во Женева.
