Porsche и официјално ја претстави новата генерација на луксузниот спортски седан Panamera, а според германската компанија, за новиот модел ги редизајнирале и подобриле сите елементи се до најситниот детаљ.
Новата Panamera има поспортски изглед од претходната генерација, а линијата на покривот повеќе потсетува на купе отколку на луксузен седан. Подолгото меѓуоскино растојание и пократката предница, заедно со поострите линии го комплетираат впечатокот дека новата Panamera е поблиску до 911 отколку до Cayenne.
Менувањето на секој детаљ се однесува и на внатрешноста, па дизајнот на ентериерот е под влијание на последната 911-ка, но со дополнителни детали како екрани со висока резолуција, и разни површини и функции кои се осетливи на допир.
На централната конзола се наоѓа 12,3 инчен екран на допир со новиот Porsche Communication Management (PCM) систем, а екрани може да добијат и патниците на задните седишта.
Покрај подобрениот изглед, Porsche тврди дека новата Panamera ќе има подобри возачки перформанси, а успешно ќе ги спојува двете контрастни карактеристики - перформансите на спортски автомобил и комфорот на луксузен седан.
На почетокот Panamera ќе биде достапна со 2.9 - литарскиот V6 турбо мотор како и со 4.0 литарскиот V8 бензинец, а за прв пат ќе биде достапна и 4.0 литарска V8 дизел верзија со погон на сите четири тркала. Сите мотори се поврзани со новиот 8-степен менувач со двојна спојка, а подобрен е и погонот на сите четири тркала.
Послабиот 2.9-литарски V6 мотор произведува 440 коњски сили и 550Nm максимален вртежен момент, а забрзувањето од 0-100 километри на час е за 4,4 секунди или за 4,2 секунди со Sport Chrono пакетот. Максималната брзина е 289 километри на час.
Најсилниот модел располага со 550 коњски сили што ги испорачува од 4.0 литарскиот бензински би-турбо V8 мотор. Забрзувањето од 0-100 километри на час е за 3,8 секунди или за 3,6 секунди со Sport Chrono пакетот, а максималната брзина е 306 километри на час.
Новина е дизелската верзија Panamera 4S Diesel која има 422 коњски сили и 850Nm максимален вртежен момент, а V8 агрегатот испорачува максимална брзина од 285 километри на час. Станува збор за најбрзиот сериски модел со дизел мотор во светот, кој има забрзување од 0-100 километри на час за 4,5 секунди и две стотинки побрзо со Sport Chrono пакетот.
Купувачите ќе ги добијат првите модели на 5 ноември, а во Германија автомобилот ќе чини 113.027 евра за Panamera 4S, 116.954 евра за 4S Diesel и 153.011 евра за најсилната Panamera Turbo.
