Прекинот синоќа во Париз беше предизвикан од судија. Не судија нападнат од фудбалери, туку поради судија кој поради избор на зборови ненамерно навреди црномурен фудбалер.
Само 14 минути се играше фудбал синоќа на „Парк де Пренс“ стадионот во Париз каде копјата ги вкрстија ПСЖ и Башакшехир од Истанбул. Во таа минута настана мешаница по што фудбалерите си заминаа во соблекувалните.
Минута пред прекинот Преснел Кимпембе го фаулираше Фредрик Губрансен, а фаулот предизвика реакција од гостинската клупа. Во обид четвртиот судија Себастијан Костантин Колтеску да му разјасни на главниот судија Овидиу Алин Хацеган кој дофрлал од гостинската клупа му рекол „Оној црниот таму“, зборови кои гостите ги слушнале.
Зборовите биле наменети за Пјер Вебо, поранешен камерунски напаѓач, а сега помошник тренер. Најжестоко реагираше Демба Ба кој за својата реакција доби и црвен картон.
Гостите обвинуваат и дека судијата не ни рекол 'црнец' туку дека рекол 'негро', збор што е навистина навредлив.
„Никогаш не велиш 'оној белец' туку велиш 'оној човек'. Зошто кога треба да вмешаш црнец потенцираш 'оној црнион'?“, се објаснуваше Ба со Колтеску.
Првично имаше најави дека натпреварот ќе продолжи синоќа во 22 часот, а четвртиот судија ќе биде заменет со еден од судиите во ВАР собата. Но, до такво нешто не дојде.
УЕФА донесе одлука натпреварот да се игра денеска од 19 часот продолжувајќи од моментиот на прекин, односно од 14. минута.
Затоа, пак, УЕФА направи комплетна промена на судиите. Романската четвртка е испратена дома, а дополнително ќе следува истрага да се утврди дали имало или немало расизам од страна на судиите.
Натпреварот вечерва ќе го судат мешани судии: главен ќе биде Дани Макели од Холандија, ќе му помагаат неговиот сонародник Марио Дикс и Марцин Боњек од Полска, четврти ќе биде Бартош Франковски од Полска, а во ВАР собата ќе седат Марко Ди Бело и Маурицио Маријани од Италија.
ПСЖ веќе има обезбедено осминафинале, но со победа ќе заврши прв го групата, додека Башакшехир нема шанси да го избрегне последното место.
