Јануари традиционално е месецот со најмногу уплати на членарини во теретаните, студијата за јога и пилатес и други курсеви за физичка активност. Пандемијата можеби ќе го смени тоа, но нема да го смени откажувањето од вежбање пред 1 февруари.
Додека некои избираат да креваат тегови или да трчаат, да се истегнуваат или да вежбаат прецизност, има луѓе кои претпочитаат групни вежби или спортски активности.
Експертите од GolfSupport.com одлучија да испитаат од кои спортови луѓето најбрзо се откажуваат откако ќе се запишат во клуб или група. Испитале 6.435 Европејци со кои спортови се занимавале во минатото и колку недели биле редовни или колку време им требало да престанат да ги играат.
Боксот е на прво место. Во просек, луѓето престануваат да се занимаваат со овој спорт во рок од четири недели. Следи шинти, тимска игра која се игра со палки и топка, претежно во Шкотска. Луѓето губат интерес за овој спорт по пет недели.
Танцот престанува да биде интересен по шест недели, додека за рагби се губи интерес по седум недели вежбање. На петтото место се боречките вештини од кои луѓето се откажуваат по осум недели.
Топ 10 вклучува и харлинг, веслање, хокеј, стрелаштво и лакрос.
GolfSupport.com може да потврди дека интересот за учење јога трае најдолго кај луѓето. Повеќето испитаници „издржале“ 40 недели. Потоа следат фудбал, голф, тенис и нетбол.
Најчестите причини зошто луѓето се откажуваат се недостаток на мотивација, недостаток на време, трошоци за тренирање и опрема, како и повреди, додека главните причини зошто луѓето не се откажуваат од одредена активност се подобрената кондиција, уживањето во вежбањето, желбата за натпреварување и дружењето.
