Берзанските индекси на Волстрит вчера паднаа петти по ред трговски ден, при што и Dow Jones падна во подрачјето „мечка“ бидејќи инвеститорите стравуваат дека агресивното зголемување на каматните стапки од страна на американската централна банка ќе ја турне економијата во рецесија.
Dow Jones се лизна за 1,11 отсто, на 29.260 поени, додека S&P 500 загуби 1,03 отсто, на 3.655 поени, а индексот Nasdaq загуби 0,60 отсто, на 10.802 поени. Откако S&P 500 и Nasdaq паднаа на надолна територија во петокот, 20 отсто под нивните рекордни максимални вредности, вчера на таа територија им се придружи и Dow Jones.
Падот на овие индекси пет последователни дена е резултат на стравувањата на инвеститорите дека агресивното заострување на монетарната политика на ФЕД ќе ја турне економијата во рецесија. Минатата недела ФЕД ги зголеми каматните стапки трет пат по ред за 0,75 процентни поени, на опсег од 3 до 3,25 отсто, што е нивно највисоко ниво од 2008 година.
И челниците на ФЕД изјавија дека дополнително ќе ја зголемат цената на парите со цел да се намали инфлацијата од највисоките нивоа во повеќе од 40 години. Но, агресивните планови на Банката на федерални резерви да ја ограничи инфлацијата до целта од 2 проценти ќе бидат потребни години, ќе го забави економскиот раст и ќе ја зголеми невработеноста, покажуваат проекциите на ФЕД.
Технички, американската економија веќе е во рецесија, имајќи предвид дека во последните два квартали бележи пад на квартална основа, но засега рецесијата е плитка. Деновиве на берзите најмногу се шпекулира за тоа колку повеќе ФЕД би можел да ги зголеми каматните стапки.
„Инвеститорите штотуку видоа 'колку е часот'. Постои голема неизвесност за тоа колку повеќе ФЕД ќе ги зголеми каматните стапки? До 4,6 или дури 5 проценти? Кога ќе заврши тој процес во 2023 година?“, објаснува Џејк Долархид, директор во Longbow Asset Management.
И на повеќето европски берзи цените на акциите вчера паднаа. Лондонски FTSE индекс зајакна за 0,03 отсто, на 7.020 поени, но франкфуртски DAX се лизна за 0,46 отсто, на 12.227 поени, а париски CAC 0,24 отсто, на 5.769 поени.
