Претседателите на САД и Кина, Доналд Трамп и Си Ѓинпинг, се согласија да не ја заоструваат трговската војна и ветија дека ќе се воздржат од воведување нови тарифи во наредните 90 дена.
Ветувањето следи во моменти кога двете најголеми стопанства на светот преговараат за трајна спогодба.
Примирјето меѓу САД и Кина било постигнато вчеравечер меѓу Трамп и Си, на маргините на Самитот Г-20 во Буенос Аирес, Аргентина.
Двајцата лидери се согласија да го стават на пауза воведувањето на нови царински тарифи и да ги засилат трговските преговори, рече кинескиот министер за надворешни работи Ванг Ѓи на прес-конференција во Буенос Аирес.
„И двете страни сметаат дека принципиелната спогодба постигната меѓу двајцата претседатели ефикасно го спречува понатамошното ширење на економските проблеми меѓу двете земји“, рече тој.
САД сепак имаат ултиматум
Белата куќа соопшти дека средбата била „многу успешна“ и дека САД ќе ги задржат постоечките тарифи на кинеска стока вредна 200 милијарди долари на 10 % и дека ќе се воздржи од зголемување на стапката на 25% како што беше планирано да се направи на 1 јануари.
Во замена за тоа, САД сакаат веднаш да се почнат преговори за праксата на Кина за која Трамп најмногу изразува загриженост, а тоа е крадењето на интелектуална сопственост и сајбер кражби.
По 90 дена, ако нема напредок во поглед на структурни реформи, САД ќе ги зголеми царините на 25%, порача Белата куќа.