Лас Вегас, 24 јули 2019 (МИА) – Мани Пакјао уште еднаш го предизвика Флојд Мејведер на реванш-дуел, откако Американецот ја испровоцира филипинската ѕвезда дека продолжува да се бори и по 40-тата година.
Пакјао (40), кој го победи Кит Турман по судиска одлука во текот на викендот, му врати на Мејведер во социјалните мрежи: „Доаѓаш на моја борба и го користиш моето име во пост, но дали јас сум тој, кој сака да остане важен? Ако сакаш повторно да станеш важен … # MayPac2“, пишува Пакјао на Твитер.
Мејведер, кој се откажа на 40-годишна возраст во 2017 година со невиден рекорд од 50-0, претходно изјави дека „кариерата и наследството на Пакјао биле изградени од асоцијацијата со неговото име“.
– Време е да престанете да го користите моето име за „кликбајт“ и да оставите неговото да зборува само за себе, напиша Мејведер на Instagram. – Кога излеговме на рингот, победив толку лесно, што сите мораа да си ги изедат зборовите“, додаде Американецот до фотографијата од неговата победа над Пакјао во 2015 година.
Мејведер не сакаше да коментира за можен реванш, одговорајќи му на Филипинецот подоцна во објава на социјалните мрежи.
– На крајот на краиштата, правам повеќе пари од тебе … Те победив физички и ментално. Запомни, ти се бориш затоа што треба, а јас се борам кога сакам, заклучи Американецот.
Мејведер е еден од седумте професионални боксери кои го победиле Пакјао – единствениот боксер кој освои шест светски титули во осум различни дивизии.
