Македонскиот капитен видно расположен по синоќешната победа најави дека оваа генерација има сили да се избори за историски пласман на едно големо натпреварување.
Синоќа Македонија минимално славеше над Израел доаѓајќи до посакуваната победа за пласман на третото место во квалификациската група. Горан Пандев одигра 79 минути пред да биде заменет со Даниел Аврамовски.
„Оваа генерација може! Се надеваме дека ќе ја израдуваме македонската јавност. Имаме долго време до натпреварот со Косово и мислам дека имаме големи шанси. Публиката ќе биде нашиот дванаесетти играч. Со нетрпение го очекуваме март и мислам дека заслужуваме да играме на Европското првенство“, рече нашиот капитен после победата над Израел.
Третото место иако е историско како прв ваков наш пласман, сепак не нѐ води никаде. Само првите две одат на ЕУРО.
„Одигравме еден одличен квалификациски циклус, некој на почетокот да ни понудеше дека ќе освоиме трето место, веднаш ќе прифатевме. Знаевме дека мора да се победат фаворитите Полска и Австрија за да се оди на ЕУРО. Токму тие натпревари и поразите од нив ни ги уништија шансите за пласман“.
Сега следува пауза до март кога Македонија ќе игра против Косово во полуфиналето од баражот за пласман на ЕУРО 2020 преку Лигата на нации. Нашата репрезентација е домачќин, а ФФМ допрва ќе одреди на кој стадион ќе се игра натпреварот, но како што стојат работите тоа ќе биде арената „Тоше Проески“.
Победникот од тој натпревар ќе игра во финалето против победникот од пресметката на Грузија со Белорусија. Само една репрезентација од овие четири ќе се избори за учество на континенталниот собир.
