Земјите од Европската унија (ЕУ) кои одбиваат да прифатат бегалци би можеле да бидат соочени со високи парични казни, стои меѓу предлозите за ревизијата на прописите на Унијата за азил, кои во среда треба да бидат објавени, пренесуваат светските агенции.
Казните се дел од планот на Европската комисија за рамномерна распределба на товарот од прифаќањето на стотиците илјади луѓе кои бегаат од судирите и насилството во земјите како што е Сирија.
Според документот во кој увид имала агенцијата АР, казните, наречени „придонес на солидарноста“, би можеле да изнесуваат по 250 илјади евра за секој барател на азил кого некоја земја ќе одбие да го прими.
Прописите на Унијата предвидуваат бегалците да аплицираат за азил во првата земја од ЕУ каде тие ќе пристигнат. Практично ова значи во Грција или Италија, со што двете земји се преоптоварени од големиот број на бегалци. Новиот план на Европската комисија треба да биде прифатен од страна на земјите членки и од европратениците.