На 30 април, во паркот „Ибни Пајко“, со почеток од 13 часот, ќе се одржи осмото по ред издание на целодневниот џез хепенинг со кој Националниот џез оркестар се приклучува кон глобалната прослава на Меѓународниот ден на џезот.
Годинава на сцената ќе ги видиме: Сашко Николовски Септет (Македонија), Фани Поса Квартет (Унгарија/Србија/Германија), Гоце Стевковски - Богданци Реунион квартет (Македонија), Лана Јањанин Квартет (Хрватска), Џијан Емин и Магичниот оркестар (Македонија) и Карлос Сардуј Грув Месинџерс (Куба).
На настапите им претходи работилницата Џез за деца која се одржува секоја година, наменета за деца од 3 години па нагоре, на која најмладите ќе имаат можност да се запознаат музичките инструменти кои се користат во Националниот џез оркестар, како и да учествуваат во заедничка композиција.
Оваа меѓународна манифестација, поддржана од Генералниот директор на УНЕСКО, Одри Азулеј, и легендарниот џез-пијанист и композитор Херби Хенкок, кој е амбасадор на УНЕСКО за меѓукултурен дијалог и претседател на Институтот за џез Херби Хенкок, секоја година поврзува заедници, училишта, уметници, историчари, академици и џез ентузијасти ширум светот да слават и да научат нешто повеќе за џезот и неговите корени, за неговата иднина и влијание, истакнувајќи ја потребата од меѓукултурен дијалог и меѓусебно разбирање, и зајакнување на меѓународната соработка и комуникација.
Секоја година, на 30 април, џезот како меѓународна уметничка форма е препознаен како алатка за промовирање на мир и дијалог меѓу културите; почитување на различноста, човековите права и достоинство; алатка за искоренување на дискриминацијата; негување родова еднаквост и промовирање на слободата на изразување.
„Ден пред 1 мај, ве покануваме да заборавите на секојдневните рутини и обврски и да ни се придружите на настанот по кој е препознатлива пролетта во Скопје - глобалната прослава на џезот и неговите придобивки! Бидете дел од ова случување, заедно да уживаме во радоста на џез музиката бидејќи на овој ден, сѐ е џез!“, велат организаторите.
