Ракомет
КАДЕТСКО СВЕТСКО ПРВЕНСТВО СКОПЈЕ 2019

Победа над Аргентина за крај

15. август 2019 - 17:38 | Ф.З.

Кадетската репрезентација на Македонија ја совлада Аргентина во битката за 13-тото место славејќи победа од 29:26.

Желни да го обелат образот за лошиот пласман и да ѝ се реваншираат на Аргентина за изненадувачкиот пораз во првото коло од фазата по групи, младите македонски ракометари уште на почетокот најавија дека Аргентинците овој пат нема што да бараат.

На полувреме нашите надежи заминаа со висока предност од седум голови разлика (15:8), а вториот дел го почнаа со истото темпо. Сепак, на десетина минути до крајот дозволија Аргентина да се доближи, па на пет минути до крајот предноста се стопи на само три разлика.

Слично беше и на претходната пресметка, но овој пат младите Македонци не дозволија да се случи пресврт и забележаа победа од 29:26. Најефикасен на натпреварот беше Кристијан Симоноски со 9 голови.

Македонија Мундијалот на домашен терен го заврши 13-та од 24 учесници. Остваривме три победи (Нигерија, Бахреин, Аргентина) и четири порази (Аргентина, Данска, Јапонија, Португалија).

Коментирај