Неповторливиот автор и издавач кој стои зад стриповската машинерија Marvel, Стен Ли, почина денеска на 95-годишна возраст, а веста ја потврди и неговата ќерка Џеј Си Ли. Тој стоеше зад култни стриповски и филмски франшизи како „Spider-Man“, „The X-Men“, „Thor“, „Iron Man“ и многу, многу други.
Легендарниот Стен Ли успеа да доживее длабока старост, но неговите дела и наследството кое го остави за стриповската и филмската индустрија ќе останат да живеат засекогаш.
Стен Ли е роден на 8 декември 1922 година и за првпат почна да работи на стрипови за Капетан Америка во четириесеттите години од минатиот век, кога неговиот вујко го вработи во Timely Publications. Кратко потоа, тој служеше војска за време на Втората светска војна и се здоби со ветерански статус.
Неговиот пробив кон славата дојде само 20 години подоцна, кога во 1961 година заедно со Стив Дитко, Џек Кирби и неколкумина други ја преименуваше компанијата Atlas Comic (Timely Publications) во Marvel Comics. Раѓањето на легендата започна кога излезе првиот број на „Fantastic Four“ – до денешен ден најстариот и најдолгиот стрип серијал за група суперхерои.
Оттогаш Стен Ли ги издаде легендарните „Spider-Man“, „Thor“, „Iron Man“, „The Hulk“ и многу, многу други наслови кои денес се поголем дел од поп културата од било кога претходно. Неговото наследство остана да живее преку кратките појавувања во филмовите на Marvel, а безброј млади луѓе се запознаа со неговиот лик и дело токму преку нив. Низ текот на годините тој стана светски познат бизнисмен и неговата слава растеше од ден на ден, но тој остана доследен на љубовта за стриповите до последниот ден од животот.
Во последните неколку години тој боледуваше од разни болести, беше хоспитализиран поради пневмонија и неговото здравје беше дискутабилно во секој момент. Неговата сопруга Џоан Клејтон Букок, со која беше во брак 70 години, почина во 2017 година а тој остана да живее со неговата ќерка Џеј Си Ли.
Почивај во мир, Стен.
Excelsior!
