Понекогаш одговорите на најголемите мистерии лежат на местото каде што нема ни да помислите да ги барате. Европската вселенска агенција (ESA) пронајде остатоци од загубени континенти кои милиони години биле скриени под мразот на Антарктикот.
Сателитските снимки покажуваат како се движеле древните копнени маси кои се закопани на длабочина од скоро два километри под површината на мразот.
Научниците велат дека снимките даваат нов поглед и сознанија за Антарктикот, континент кој е малку истражен баш поради тоа што е многу тешко да се истражува под огромните слоеви мраз. Тие досега ги користеа податоците од сателитот GOCE, кој е лансиран во 2009 година и неговата задача е да ги следи варијациите на гравитациското поле на Земјата за прецизно да ја измери нашата планета.
Овој сателит не е во употреба веќе пет години откако остана без гориво и падна низ атмосферата. Меѓутоа, неговите податоци се многу значајни бидејќи се искористени за новото научно откритие.
Неговите инструменти го следеа движењето на тектонските плочи под Антарктикот, па истражувачите со помош на основните податоци сфатија како тие се движеле во изминатите 200 милиони години и дојдоа до сознание како всушност бил формиран ледениот континент.
„На источниот дел од континентот можеме да видиме геолошки карактеристики кои ги покажуваат сличностите и разликите на обвивката на Антарктикот и на останатите континенти кои биле споени до пред 160 милиони години“, вели Фаусто Феракиоли за ESA.
Освен што овие мерења се навистина интересни од историска гледна точка, тие се подеднакво важни за да разбереме како Антарктикот влијае на однесувањето на ледените плочи, но и колку брзо реагира на карактеристиките на мразот.