Објавен е првиот тизер трејлер за „John Vardar vs. the Galaxy“, првиот македонски долгометражен анимиран филм, дело на македонската компанија Lynx Animation Studios.
„John Vardar vs. the Galaxy“ ќе ја раскаже приказната за главниот херој Џон Вардар, кој ќе биде киднапиран од вонземјани, по што ќе заврши со најмоќното оружје во универзумот, во неговата глава: сè што ќе помисли, станува реалност.
Идејата за „John Vardar vs. the Galaxy“ се родила уште во 2009 година, од серија цртежи на Михајло Димитриевски - Тхе Мичо, кој е уметнички директор на овој проект.
Режисер и сценарист на филмот е Гоце Цветановски - еден од најекспонираните автори на кратки филмови и автор на музички спотови во Република Македонија, со преку 100 фестивали во портфолиo, кoи ги прикажувале неговите кратки филмови. Сега го води креативниот сектор на Lynx Animation Studios. Директор на анимација на филмот е Бенџамин Хотон.
Филмот во моментов е во фаза на пред-продукција, a со продукција ќе се почне во jануари 2017 год. Датумот на завршување се очекува да биде декември 2019 година.
„Ќе се прикажува во сите домашни кина, како и во странство, благодарение на ко-продуцентите од Франција, Германија, Украина и Бугарија. За фестивали е сè уште e рано да се зборува, поради тоа што е толку далеку финалниот продукт“, велат од Lynx Animation Studios, на тема прикажување на филмот.
Анимираниот филм е замислен како забавна вселенска опера за целото семејство, која со нетрпение ја очекуваме.
Погледнете го тизер трејлерот за филмот: